Æðislega gott og einfalt rjóma hvítlauks pasta sem bræðir hjörtu. Öll hráefnin í þessari uppskrift passa svo leikandi vel saman og dekra við bragðlaukana.

Heilhveiti pastað frá Garofalo spilar stórt hlutverk í því hversu góður þessi réttur er en pastað er í hæsta gæðaflokki. Ég mæli alltaf með heilhveiti pasta þar sem það er heilsusamlegra og að mínu mati betra.

Rjómalagað hvítlauks pasta með portobello sveppum og kjúkling, uppskrift:

• 250 g pasta
• 2 kjúklingabringur
• salt og pipar
• 4 msk smjör
• 3 hvítlauksgeirar
• 250 g sveppir
• 1 tsk oregano
• 250 ml rjómi
• 150 ml kjúklingasoð (vatn og kjúklingakraftur)
• fersk steinselja

Aðferð:

1. Sjóðið pastað samkvæmt leiðbeiningum á poka
2. Skerið kjúklingabringurnar í smáa bita, kryddið með salt og pipar og steikið á pönnu þangað til eldað í gegn.
3. Takið kjúklinginn af pönnunni og geymið.
4. Skerið hvítlauksgeirana smátt, bræðið 2 msk af smjöri á pönnunni og steikið hvítlaukinn létt.
5. Skerið sveppina í sneiðar, bætið við smjöri á pönnuna og steikið sveppina.
6. Hellið rjómanum og kjúklingasoðinu á pönnuna og kryddið með oregano, salt og pipar og sjóðið.
7. Þegar pastað er orðið full eldað þá setjiði það út í sósuna og blandið saman.
8. Skreytið með ferskri steinselju.

Njótið vel!

Ykkar, Linda Ben