Grilluð túnfisksamloka með bræddum osti.
Stundum er einfaldleikinn bestur – sérstaklega þegar hann bragðast svona vel! Þessi grillaða túnfisksamloka með bræddum osti er algjörlega ómótstæðileg, stökk að utan en mjúk og bragðmikil að innan. Túnfiskur, harðsoðin egg, paprika, kóríander og majónes skapa ferskt og djúsí salat sem bráðnar svo saman við ostinn á pönnunni.
Súrdeigsbrauðið gefur samlokunni fallegt bit og smjörið á ytra borðinu tryggir gullinbrúna og stökka skel. Fullkomin samloka í hádegismatinn, nesti eða þegar þú þarft eitthvað fljótlegt og ótrúlega gott.
Grilluð túnfisksamloka með bræddum osti
- 2 sneiðar súrdeigsbrauð (ég nota frá Pagen)
- 4 egg
- 1 dós Ora túnfiskur bitar í vatni
- 1 rauð paprika
- 1/2 laukur
- 15 g kóríander
- 2 kúfaðar msk mæjónes
- Sítrónupipar
- Salt
- Ostur
- Smjör
Aðferð:
- Byrjið á því að harðsjóða eggin, kæla þau og skera í litla bita. Setjið í skál.
- Hellið vatnið af túnfisknum í dósinni og setjið einnig í skálina.
- Skerið papriku, lauk og kóríander smátt niður og bætið í skálina ásamt majónesi, sítrónupipar og salti. Blandið öllu vel saman.
- Smyrjið tvær brauðsneiðar með smjöri. Setjið túnfiskasalat og ost á brauðið (ekki á smjörhliðarnar, þær eiga að snúa út).
- Steikið brauðið á pönnu við meðalhita þar til brauðsneiðarnar hafa brúnast og osturinn bráðnað.
Ef þú prófar þessa uppskrift þá þætti mér svo vænt um að heyra frá þér! Skildu eftir skilaboð hér fyrir neðan, eða taktu mynd og merktu mig á Instagram @Lindaben
Njótið vel!
Ykkar
