Þessar Buffalo kjúklingasalatvefjur eru ferskar, stökkar og alveg ótrúlega bragðgóðar! 🌶️🥬
Kjúklingurinn er blandaður saman við buffalosósu, mæjónes, stökka papriku og sellerí og ferskt kóríander. Í stað hefðbundinna tortilla er kjúklingasalatið sett fersk salatblöð frá Vaxa sem gerir réttinn bæði léttan og einstaklega góðan.
Vefjurnar eru skemmtilegar að bera fram eins og lítil taco og henta vel sem léttur kvöldmatur, hádegismatur eða jafnvel á veisluborðið. Þið getið svo auðveldlega stjórnað styrkleikanum með því að setja meiri eða minni buffalosósu eftir smekk.
Buffalo kjúklingasalatvefjur
- 3 kjúklingabringur
- Kjúklingakryddblanda
- 1 paprika
- 1 sellerísstöngull
- 15 g kóríander frá Vaxa
- ½ – 1 dl buffalosósa
- 1 dl mæjónes
- Salt og pipar
- Salathaus frá Vaxa
Aðferð:
- Kveikjið á ofninum og stillið á 200°C, undir og yfir hita.
- Kryddið kjúklinginn og bakið inn í ofni þar til eldaður í gegn, u.þ.b. 25-30 mín. Skerið kjúklinginn niður í litla bita (eða tætið hann) og setjið í stóra skál.
- Skerið paprikuna og selleríið smátt og saxið kóríanderið. Setjið allt í skálina ásamt buffalo sósu og mæjónesi. Kryddið með salti og pipar og blandið öllu vel saman. Smakkið til með meiri buffalosósu
- Takið blöðin af salathausnum og raðið þeim á bakka. Setjið vel af kjúklingasalatinu á hvert salatblað og berið fram eins og taco.
Ef þú prófar þessa uppskrift þá þætti mér svo vænt um að heyra frá þér! Skildu eftir skilaboð hér fyrir neðan, eða taktu mynd og merktu mig á Instagram @Lindaben
Njótið vel!
Ykkar
Share this:
Category: