Humarbrauð með bræddum osti.

Ef þú vilt gera eitthvað sem er bæði einfalt og smakkast eins og alvöru lúxus, þá þarftu að prófa þetta humarbrauð ✨

Hér nota ég humarsúpu sem grunn og lyfti henni upp með hvítlauk, smá chilli og safaríkum humarhölum. Allt er svo sett í gott baguette (helst súrdeigs) sem dregur í sig bragðið og verður mjúkt og djúsí að innan, á meðan osturinn bráðnar yfir og verður fallega gylltur og stökkur að ofan.

Útkoman er svona réttur sem minnir meira á eitthvað sem þú færð á veitingastað, en er í raun ótrúlega einfaldur að gera heima. Fullkominn sem helgarkósý, forréttur eða þegar þú vilt dekra aðeins við þig og aðra 🦞✨

Svona uppskrift sem lítur út fyrir að vera flókin en er það alls ekki og klárast alltaf fyrst af borðinu 💛

Humarbrauð með bræddum osti

• Baguette (súrdeigs ef hægt)
• Ora humarsúpa
• 400 g litlir humarhalar skelflettir
• 2 hvítlauksgeirar
• 1/4 tsk þurrkað chillí
• 100 g rifinn mozzarella
• Pipar
• 15 g fersk steinselja

Aðferð:

1. Kveikið á ofninum og stillið á 200°C, undir og yfir hita.
2. Skerið toppinn af baguette brauðinu, skerið ofan í það svo það myndist pláss fyrir humarhalana.
3. Rífið niður hvítlauksgeirana og steikið létt ofan í potti og hellið svo humarsúpunni ofan í pottinn. Bætið einnig örllítið af chillí kryddi ofan í og skelflettu humarhölunum. Hitið að suðu.
4. Setjið humarinn með súpunni ofan í brauðið, toppið með rifnum mozzarella. Bakið í 15 mín eða þar til osturinn hefur bráðnað og er byrjaður að gyllast.
5. Kryddið með pipar og toppið með ferskri steinsellju.