Hér höfum frægu mjúku kanilsnúðana mína nema án mjólkurafurða og eggja. Þetta eru nákvæmlega sömu mjúku og djúsí snúðarnir nema í þetta skiptið eru þeir fyrir alla! Ofnæmispésa, vegan og alla aðra.

Það kemur í ljós að egg eru alls ekki nauðsynleg í þessa uppskrift og því var því einfaldlega sleppt hér, en í staðin fyrir mjólkina er notað hafrajógúrt með karamellu og perum frá Veru Örnudóttir, en það er mín uppáhalds vara til að baka mjólkurlausar uppskriftir úr. Jógúrtið skilar sér í einstaklega mjúkum og bragðgóðum snúðum.

Mjólkur og eggjalausir mjúkir kanilsnúðar með glassúri

• 7 g þurrger
• 100 ml volgt vatn
• 250 ml Hafrajógúrt með karamellu og perum frá Veru Örnudóttir
• 80 g brætt jurta/vegan smjör
• 450 g hveiti
• ½ dl sykur
• 1 tsk salt

Fylling

• 120 g mjúkt jurta/vegan smjör
• 2 dl sykur
• 2 msk kanill

Glassúr

• 400 g flórsykur
• ½ tsk vanilludropar
• 4-5 msk heitt vatn

Aðferð

1. Byrjið er á að setja hafrajógúrt í skál, hitið 100 ml af vatni að suðu og hellið út í jógúrtið, blandð saman. Bætið gerinu útí og hrærið, leyfið að standa í smá stund.
2. Setjið hveitið í skál, bætið út í það sykrinum og saltinu.
3. Bræðið jurta smjörið, leyfið því að kólna svolítið.
4. Hellið jógúrt-gerblöndunni út í hveitið og hrærið, hellið brædda smjörinu einnig út í á meðan deigið hnoðast.
5. Látið deigið hefast í 1 – 1 ½ klst eða þangað til deigið hefur tvöfaldast í stærð.
6. Þegar deigið hefur hefast, dreifið þá svolítið af hveiti á borðið, takið deigið úr skálinni og fletjið það út í um það bil 20×40 cm flöt.
7. Blandið saman mjúku vegan smjöri, sykri og kanil í skál, hrærið þar til blandað saman. Smyrjið fyllingunni yfir allt deigið.
8. Rúllið svo upp deiginu frá 40 cm endanum í lengju og skerið hana svo í 12 – 15 bita.
9. Smyrjið frekar stórt eldfast mót með smjöri og raðið snúðunum ofan í formið, það má vera frekar rúmt á milli snúðanna því þeir eiga eftir að stækka.
10. Leggið hreint viskustykki yfir formið og látið snúðana hefast í um það bil 30 mín.
11. Stillið ofninn á 175°C og undir og yfir hita.
12. Setjið snúðana í ofninn og látið bakast í 35-45 mín (tími fer eftir hversu þykkir snúðarnir eru) eða þangað til þeir eru orðnir fallega gullnir á litinn.

Ef þú prófar þessa uppskrift þá þætti mér svo vænt um að heyra frá þér! Skildu eftir skilaboð hér fyrir neðan, eða taktu mynd og merktu mig á Instagram @Lindaben

Fylgistu með á Instagram!

Fylgstu með á Tiktok!

Njótið vel!

Ykkar