Ég hélt að brownie gæti ekki orðið betri… þar til ég prófaði að toppa hana með súkkulaðipoppi! 😍🍿

Þessi brownie er einstaklega mjúk, djúsí og rík af súkkulaðibragði en það sem gerir hana svo sérstaka er stökka súkkulaðipoppið sem gefur kökunni ótrúlega skemmtilega áferð og gerir hvern bita enn betri.

Þetta er svona kaka sem vekur athygli á veisluborðinu og hverfur alltaf fyrst. Fullkomin þegar mig langar að baka eitthvað aðeins öðruvísi sem slær í gegn hjá bæði krökkum og fullorðnum

Ómótstæðileg Popp brownie

200 g smjör
300 g Síríus suðusúkkulaði
300 g sykur
4 egg
60 g hveiti
40 g kakóduft
200 g Nóa Popp

Aðferð:

Kveikið á ofninum og stillið á 175°C, undir- og yfirhita.
Bræðið smjör og suðusúkkulaði varlega saman í potti.
Þeytið eggin og sykurinn þar til þau verða létt og ljós.
Hellið súkkulaðiblöndunni varlega saman við eggin og hrærið rólega á meðan.
Blandið saman hveiti og kakó og hrærið saman við súkkulaðiblönduna.
Smyrjið form sem er 24×24 cm ad stærð (eda álíka stórt), hellið deiginu í formið og bakið í u.þ.b. 35 mín.
Dreifið súkkulaðipoppinu yfir kökuna og pressið því örlítið ofan í hana með spaða. Látið kökuna standa í um 2 klst við stofuhita áður en hún er skorin.

Ef þú prófar þessa uppskrift þá þætti mér svo vænt um að heyra frá þér! Skildu eftir skilaboð hér fyrir neðan, eða taktu mynd og merktu mig á Instagram @Lindaben

Fylgistu með á Instagram!

Fylgstu með á Tiktok!

Njótið vel!

Ykkar