Súkkulaðifudge-kaka með cookies & cream-smjörkremsfyllingu
Þessi súkkulaðikaka er algjör draumur fyrir alla súkkulaðiunnendur! Mjúkir og safaríkir súkkulaðibotnar með ríkulegu súkkulaðifudge-kremi og dásamlegri cookies & cream-smjörkremsfyllingu á milli. Samsetningin er alveg ómótstæðileg!
Ég nota Ljúffenga súkkulaðiköku – þurrefnablönduna mína í botnana, sem gerir baksturinn einstaklega einfaldan. Botnarnir verða mjúkir og góðir og passa fullkomlega með silkimjúku súkkulaðikreminu. Á milli þeirra fer svo ljóst og loftmikið smjörkrem með stökkum súkkulaðikexbitum sem gefur kökunni skemmtilega áferð og þetta góða cookies & cream-bragð.
Súkkulaðifudge-kremið er gert úr súkkulaði, rjóma og smjöri og verður dásamlega mjúkt og ríkulegt. Það er bæði notað á milli botnanna og utan um alla kökuna, svo hver sneið er stútfull af súkkulaðigóðgæti.
Þetta er ein af þessum kökum sem eru tilvaldar fyrir afmæli, veislur eða þegar mann langar einfaldlega að baka eitthvað alveg extra gott. 😍
Ljúffenga súkkulaðikökublandan mín fæst í Krónunni og Hagkaupum.
Súkkulaði fudge kaka með oreo smjörkremsfyllingu
Súkkulaðikaka
- 1 pakki Ljúffeng súkkulaðikaka – þurrefnablanda Lindu Ben (fæst í Krónunni og Hagkaupum)
- 3 egg
- 1 dl vatn
- 1½ dl bragðlítil olía
Súkkulaðifudge-krem
- 400 g súkkulaði
- 400 ml rjómi
- 300 g mjúkt smjör
Cookies & cream-smjörkrem
- 200 g mjúkt smjör
- 200 g flórsykur
- 1 dl rjómi
- 150 g súkkulaðikex (t.d. Oreo)
Aðferð
- Kveikið á ofninum og stillið á 175°C, undir- og yfirhita.
- Byrjið á að útbúa súkkulaðifudge-kremið. Hitið rjómann að suðumarki en látið hann ekki sjóða. Setjið súkkulaðið í skál og hellið heitum rjómanum yfir. Látið standa í 1–2 mínútur og hrærið síðan þar til súkkulaðið hefur bráðnað og blandan er orðin slétt. Setjið í kæli þar til blandan hefur þykknað og kólnað.
- Setjið súkkulaðikökublönduna í skál ásamt eggjum, vatni og olíu. Hrærið öllu rólega saman þar til deigið er orðið slétt og mjúkt. Skiptið deiginu jafnt á milli þriggja smurðra, 20 cm kökuforma og bakið í u.þ.b. 20 mínútur, eða þar til botnarnir eru bakaðir í gegn. Látið þá kólna alveg.
- Setjið kældu súkkulaði- og rjómablönduna í hrærivélaskál og þeytið þar til hún verður léttari og loftkenndari. Bætið mjúku smjörinu smám saman út í og þeytið þar til kremið er orðið slétt, mjúkt og loftmikið.
- Útbúið cookies & cream-smjörkremið með því að þeyta mjúkt smjör og flórsykur saman þar til blandan er orðin ljós og loftmikil. Bætið rjómanum smám saman út í og þeytið áfram. Myljið súkkulaðikexið gróflega og blandið því saman við kremið.
- Setjið fyrsta kökubotninn á kökudisk og smyrjið ¼ af súkkulaðifudge-kreminu yfir. Dreifið helmingnum af cookies & cream-smjörkreminu þar ofan á og leggið næsta kökubotn yfir.
- Endurtakið með öðrum fjórðungi af súkkulaðifudge-kreminu og afganginum af cookies & cream-smjörkreminu. Leggið síðasta kökubotninn ofan á.
- Smyrjið afganginum af súkkulaðifudge-kreminu yfir toppinn og hliðarnar á kökunni og sléttið úr.
Ef þú prófar þessa uppskrift þá þætti mér svo vænt um að heyra frá þér! Skildu eftir skilaboð hér fyrir neðan, eða taktu mynd og merktu mig á Instagram @Lindaben
Njótið vel!
Ykkar
