Sveppasúpa með osta hvítlauksbrauði sem er svo ótrúlega gott!

Ég elska gott hvítlauksbrauð með sveppasúpu. Þetta hvítlauksbrauð er fyllt með ljúffengu hvítlaukssmjöri, rifnum mozzarella og hvítmygluosti. Það er alveg einstaklega djúsí og bragðgott. Það tekur heldur enga stund að útbúa og er afar einfalt.

Fljótleg sveppasúpa með osta hvítlauksbrauði

• 900 g sveppir
• 60 g smjör
• klípa af salti
• 1 laukur
• 1 ½ msk hveiti
• 2 hvítlauksgeirar
• 1 lítið búnt timjan
• 1 líter kjúklingasoð
• 400 ml rjómi
• salt og pipar eftir smekk

Aðferð:

1. Skerið sveppina niður í sneiðar.
2. Bræðið smjörið í stórum potti og setjið sveppina í pottinn ásamt klípu af salti. Mikill vökvi mun myndast út frá sveppunum og því þarf ekki að setja meira smjör. Steikið sveppina í nokkrar mín þar til þeir eru mjúkir í gegn. Takið um það bil 1 msk af sveppum frá og geymið til að skreyta súpuna á eftir.
3. Á meðan sveppirnir steikjast þá skeriði niður laukinn, setjið svo í pottinn og steikið hann ásamt sveppunum.
4. Setjið hveitið í pottinn og hrærið saman við, steikið í um það bil 2 mín til að taka hrábragðið af hveitinu.
5. Setjið timjan út í pottinn ásamt því að rífa hvítlauksgeirana út í.
6. Hellið kjúklingasoðinu (vatn+kjúklingakrafur u.þ.b. 1-2 teningar) út í pottinn og sjóðið allt saman í u.þ.b. 10 mín.
7. Maukið súpuna með töfrasprota þangað til hún er orðin mjög fínt maukuð.
8. Hellið rjómanum út í og hitið að suðu. Kryddið með salt og pipar eftir smekk.
9. Setjið sveppina út á sem voru teknir frá áðan og berið fram. Einnig er hægt að skreyta með timjan.

Osta hvítlauksbrauð

• Baguette
• 100 g smjör
• 4 hvítlauksgeirar
• U.þ.b. 150 g rifinn mozzarella
• 1 brie eða annar hvítmygluostur

Aðferð:

1. Kveikið á ofninum og stillið á 180°C, undir og yfir hita.
2. Bræðið smjörið og rífið hvítlauksgeirana út í smjörið.
3. Skerið raufar ofan í baguette brauðið með u.þ.b. 1 cm til 1 1/2 cm á milli.
4. Setjið u.þ.b. 1 tsk af smjöri ofan í hverja rauf á baguette brauðinu, penslið svo restinni af smjörinu yfir brauðið og setjið eins og þið getið smjörið líka ofan í raufarnar mep penslinum.
5. Setjið rifna ostinn ofan í raufanar á brauðinu.
6. Skerið brie ostinn niður og setjið ofan í raufarnar á brauðinu.
7. Bakið brauðið inn í ofni í u.þ.b. 10-15 mín eða þar til osturinn er byrjaður að gyllast örlítið.
8. Skerið niður ferska steinselju og berið fram með súpunni og hvítkauksbrauðinu.

Ef þú prófar þessa uppskrift þá þætti mér svo vænt um að heyra frá þér! Skildu eftir skilaboð hér fyrir neðan, eða taktu mynd og merktu mig á Instagram @Lindaben

Fylgistu með á Instagram!

Fylgstu með á Tiktok!

Njótið vel!

Ykkar