Cheerios bollakökur.

Á dögunum fékk ég á borð til mín ótrúlega skemmtilegt verkefni en það var að gera Cheerios köku sem myndi vera notuð í auglýsingu með Sölku Sól og fjölskyldu hennar. Hug­mynd mín á bak við kök­una var að end­ur­hanna klass­ísku morgun­korn­s­kök­urn­ar sem við mörg hver þekkj­um og setja þær í nýj­an bún­ing sem við höf­um mögu­lega ekki séð áður.

Cheer­i­os­inu er velt upp úr smjör­brædd­um syk­ur­púðum og sett í bolla­köku­form. Kök­urn­ar eru seig­ar og stökk­ar en kremið ofan á gef­ur þeim meiri raka svo þær verða eins og kara­mella. Bolla­kök­un­um raðaði ég svo upp í turn til að skapa þessa glæsi­legu margra hæða köku.

Ég fékk nokkuð frjáls­ar hend­ur við gerð kök­unn­ar en skipu­leggj­end­ur aug­lýs­ing­ar­inn­ar sýndu mér mikið traust. Ég sendi nokkr­ar hug­mynd­ir um út­lit kök­unn­ar á stíl­ista aug­lýs­ing­ar­inn­ar sem voru samþykkt­ar. Ég fékk ákveðnar leiðbein­ing­ar eins og til dæm­is að Cheer­i­os-ið ætti ekki að vera malað held­ur ættu hring­irn­ir að vera heil­ir. Kak­an átti líka að líta út fyr­ir að vera ein­föld og ég fór skref­inu lengra og gerði upp­skrift­ina líka mjög ein­falda. Kak­an öll inni­held­ur bara sex inni­halds­efni, það þarf ekki að setja hana inn í bak­arofn, tek­ur stutta stund að smella henni sam­an og er upp­lagt að gera hana með dags fyr­ir­vara.

Loksins er komið að því að ég geti deilt með ykkur uppskriftinni af þessari köku. Njótið!

Cherrios bollakökur

• 170 g Cheerios
• 280 g sykurpúðar
• 50 g smjör

Krem

• 200 g mjúkt smjör
• 400 g flórsykur
• 1 dl rjómi

Annað

• 1 dl bragðlaus olía til að setja deigið í form

Aðferð:

1. Byrjið á því að bræða smjör og sykupúða á vægum hita í frekar stórum potti, það mun taka nokkrar mín og nauðsynlegt að velta sykurpúðunum með sleikju á meðan þeir bráðna.
2. Setjið Cheeriosið út í og veltið því svo það hjúpist allt í sykurpúðum.
3. Setjið 24 stk pappírs bollakökuform í bollakökuálbakka (ég notaði tvo álbakka) og skiptið deiginu á milli forma. Nauðsynlegt er að nota tvær skeiðar til að skipta deiginu í formin og velta skeiðunum alltaf upp úr bragðlausri olíu áður en skeiðarnar eru settar í deigið.
4. Setjið kökurnar í kæli á meðan kremið er útbúið.
5. Þeytið smjörið ásamt flórsykri og rjóma þar til kremið er orðið mjög mjúkt, létt og loftmikið.
6. Setjið kremið í sprautupoka með stórum opnum stjörnustút. Takið kökurnar úr pappírsbollakökuformunum og sprautið á hverja köku.
7. Raðið kökunum í hring á kökudisk, klippið hring úr smjörpappír sem er svolítið minni en hringurinn sem kökurnar mynda á disknum. Setjið smjörpappírinn á kökur og aðrar kökur ofan á (kremið mun klessast örlítið á kökunum fyrir neðan en það er allt í góðu), endurtakið fyrir restina af kökunum.
8. Skreytið til dæmis með gylltu matarglimmeri og nammi.