Linda Ben

Mjúkir kanilsnúðar með glassúri

Uppskrift eftir:
3 klst og 30 mín
Prep: 1 klst | Cook: 2 klst og 30 mín | Servings: 16 snúðar

Auglýsing

Ath. lagfærð uppskrift.

Kanilsnúðar eru alveg æðislega góðir, fullkomið síðdegissnarl þegar maður vill hafa það gott. Ég hef aldrei smakkað eins mjúka snúða áður sem eru eins djúsí og bragðgóðir.

Deigið er létt og loftmikið og fyllingin gefur hæfilega sætt kanilbragð. Leyndarmálið sem gerir snúðana svona sérstaklega góða er klárlega smjörið sem sett er á deigið áður kanilsykrinum er dreift yfir, það gerir bara allt svo bragðgott og gerir áferðina svo góða.

Eftir að hafa prófað þessa uppskrift þá þarf ég aldrei að prófa aftur aðra kanilsnúða uppskrift, að mínu mati hef ég fundið hina fullkomnu snúða.

Deig:

  • 7 g ger
  • 120 ml volgt vatn
  • 120 ml mjólk hituð að suðu
  • ½ dl sykur
  • 80 g smjör
  • 1 tsk salt
  • 1 egg
  • 6 dl hveiti
  1. Byrjað er á að setja volgt vatn og volga mjólk ásamt gerinu í litla skál og hrært smá til að allt gerið blotni.
  2. Setjið sykur, smjör, salt og egg í stóra skál og hrærið saman.
  3. Bætið svo hveitinu og gerblöndunni ofan í stóru skálina. Hnoðið deigið saman þangað til allt hefur blandast vel. Deigið á að vera mjög létt og klístrað.
  4. Látið deigið hefast í 1 – 1 ½ klst eða þangað til deigið hefur tvöfaldast í stærð.

IMG_0440

Fylling:

  • 110 g mjúkt smjör
  • 3/4 bolli sykur
  • 2 msk kanill
  1. Þegar deigið hefur hefað sig dreifið þið 1 dl af hveiti á borðið, takið deigið úr skálinni og fletjið það út í um það bil 20×40 cm flöt.
  2. Blandið saman mjúku smjöri, sykri og kanil í skál, þeytið þar til létt og ljóst eins og smjörkrem. Smyrjið fyllingunni yfir allt deigið.
  3. Rúllið svo upp deiginu frá 40 cm endanum í lengju og skerið hana svo í 12 – 15 bita.
  4. Smyrjið frekar stórt eldfast mót með smjöri og raðið snúðunum ofan í formið, það má vera frekar rúmt á milli snúðanna því þeir eiga eftir að stækka.
  5. Stillið ofninn á 170°C.
  6. Leggið hreint viskustykki yfir formið og látið snúðana hefast í um það bil 30 mín.
  7. Setjið snúðana í ofninn og látið bakast í 45 mín eða þangað til þeir eru orðnir fallega gullnir á litinn.

Glassúr:

  • 4 msk smjör
  • 2 bollar flórsykur
  • 1 tsk vanilludropar
  • 3 til 6 msk heitt vatn
  1. Á meðan snúðarnir eru í ofninum er gott að útbúa glassúrið. Það er gert með því að bræða smjörið í potti og bæta svo flórsykrinum útí og hrært vel.
  2. Bætið svo vanilludropunum útí ásamt heitu vatni. Best er að setja vatnið hægt út í og hræra vel eftir hverja skeið. Það sem við viljum er þykk fljótandi krem auðvelt er að sprauta yfir snúðana.
  3. Glassúrinu er svo komið ofan í sprautupoka eða einfaldlega venjulegan poka og klippa svo lítið gat á eitt hornið. Sprautið svo glassúrinu yfir í því magni sem þið viljið.

 

IMG_0453

Ef þú prófar þessa uppskrift, láttu mig þá endilega vita! Skildu eftir skilaboð hér fyrir neðan, eða taktu mynd og merktu mig á myndinni á Instagram @lindaben

Fylgist með á Instagram!

5 Reviews

  1. Anonymous

    Þessir eru afar góðir, hef bakað þá nokkrum sinnum.

    Star
  2. Stína G.

    Ofboðslega góðir snúðar sem klikka ekki þegar við familían höfum boðið fólki í heimsókn. Geri þessa þegar ég vil gera virkilega vel við gestina 😉

    Star
  3. Margrét

    Mæli með þessum, ótrúlega góðir!

    Star
  4. Kolbrún

    Ótrúlega mjúkir og góðir snúðar?

    Star
  5. stefanía

    Æðislegir snúðar… takk takk fyrir uppskriftina.

    Star

Leave a Review

Your email address will not be published. Required fields are marked *

*

1 2 3 4 5